Бүгүн Кирбэй нэһилиэгэр иитэр-өйдөтөр суолталаах үтүө тэрээһин буолла. Аҕа дойдуга немец фашистара сэриинэн саба түспүт күннэрэ. Сэрии хонуутугар охтубут буойуттарга сүгүрүйүү уонна кутурҕан күнүн бэлиэтэ.

Бу күҥҥэ анаан нэһилиэк общественноһа, үүнэр көлүөнэ кыттыылаах Кыайыы скверигэр олус долгутуулаах миитинг буолан ааста. Миитинг кыттыылаахтара ким да умнуллубатын, туох да умнуллубатын туһугар умайа сылдьар чүмэчи уурдулар.

Миитиҥҥэ кэлбит оҕолорго, ыччаттарга анаан нэһилиэк баһылыга Владислав Васильевич сэриигэ кыттыбыт сэрии ветераннарын ахтан санаан кэпсээтэ. Чечня сэриитигэр кыттыбыт биир дойдулаахтарбыт тустарынан оҕолорго кэпсээтэ, төрөөбүт дойду историятын, холобур буолар хорсуннук сэриилэспит дьону билиэхтээххит, аҕа саастаах дьоҥҥо өрүү убаастабыллаахтык сыһыаннаһыахтааххыт диэтэ. Уонна Кирбэй нэһилиэгиттэн Армияҕа ытык иэстэрин төлүү сулууспаҕа барар үс уолга таба муоһуттан оҥоһуллубут харысхаллары бэлэх туттартаата. Итини тэҥэ Уодай Георгий Степанович сэриигэ сылдьыбыт эһэтин Уодай Егор Христофорович туһунан ахтан-санаан ааста. Нэһилиэк спортивнай, общественнай олоҕор кыттар Павел Иванов, Любомир Иванов, Иван Кельцинов аҕа дойду иннигэр сулууспалаан ытык иэстэрин чиэстээхтик толорон кэлэллэригэр баҕарабыт!